Nafarroako Probintzia-Auzitegiak auto-gidariak aurkeztutako errekurtsoa aintzat hartu eta atzera bota du hasierako kondena. Auto-gidariak lo hartu zuela onartu zuen bere deklarazioan eta bazterreko babesaren kontra hartutako kolpearen ondorioz esnatu zela. Alkohol-tasa bikoiztu bazuen ere, azaldu zuen orduak zeramatzala edan gabe, bezperan 22:00etatik 00:30era bitartean edan zuela baina gerora ez zuela alkohol tantarik probatu. Arlo-penaleko epaileak deklarazio hauek nahikoak zirela uste izan zuen gidaria zigortzeko.
Probintzia-Auzitegiko epaileak, baina, bertzelako irizpideak izan ditu kontuan. Gidariaren alkohol-tasa 0,6 mg baino baxuagoa izan zenez, beharrezkotzat jo du alkoholaren eraginpean egoteak gidariaren gidatzeko gaitasunean eragin zuela errateko zalantza izpirik ere ez egotea. Alkohol usaina, begi dizdiratsuak eta logura begi-bistakoak izan arren, argi hitz egin eta mugimenduak ongi koordinatzen zituela jaso zuten atestatuan poliziek. Hori horrela, istripua alkoholaren eraginez gertatu beharrean nekearen ondorio izan zitekeen. Zalantza horrek absolbitzeko erabakia hartzera eraman du epailea.