Hiru eta hamalau urte bitarteko haur eta gaztetxoen sozializazio eta aisialdi osasungarria sustatzearekin bat, autonomia, kritikotasuna, sormena, talde lana, ardura, integrazioa eta bestelako gaitasunak lantzeko bitartekoak eskainiko ditu. Zerbitzua doakoa da eta ludoteka eta liburutegi zerbitzuaz gain, jolasak, tailerrak eta eskola-laguntza ere izanen dute.
Ludoteka eta jolas-tailerrak
Haur Hezkuntzakoentzat astelehenetan 17:00etatik 18:00etara eta Lehen Hezkuntzakoentzat 18:00etatik 19:00etara ludoteka zerbitzua izanen da; ostiraletan, berriz, Lehen Hezkuntzako 5. eta 6. mailakoentzat eta Derrigorrezko Bigarren Hezkuntzako 1. eta 2. mailakoentzat.
Jolasak eta tailerrak hilabeteko azken ostegunetan eginen dituzte, 17:00etatik 18:00etara; zehazki honako egunetan: urriaren 31n, azaroaren 28an, abenduaren 19an, urtarrilaren 30ean, otsailaren 20an, martxoaren 26an, apirilaren 30ean eta maiatzaren 28an.
Liburutegi zerbitzua eta eskola-laguntza
Leitzako liburutegian dagoen liburu edo filmen bat hartzeko zerbitzua ere eskainiko dute. Irakurleek, liburuak itzultzeko, jasotzen diren momentutik hilabeteko epea izanen dute eta eskaerak prebentzioa@lagagizartezerbitzua.org helbidera idatziz edo 948 51 08 40 telefonora deituz egin daitezke.
Beharra duten ikasleentzat eskola-laguntza ere eskainiko dute asteazkenetan. Dena dela, zerbitzua eskolak eta Gizarte Zerbitzuak elkarlanean kudeatu beharko dute. Hortaz, familiek berri zehatzagoa izateko horiekin harremanetan jarri beharko dute.