Autokontsumo energetikoari buruzko hitzaldia antolatu dute urrian Leitzan

Cederna Garalur Elkarteak antolatu du eta doakoa izanen da

'Nafarroa Zirkularra' ekimenaren barrenean, hiru hitzaldi antolatu dituzte, tartean Leitzakoa, urriaren 7an. Apirilean onartu zuten 15/2018 EDk autokontsumo kolektiboa sustatzeko berrikuntzak biltzen ditu eta hitzaldietan berrikuntza horiez hitz eginen dute, eta adibide praktikoekin, partikularrei, enpresei eta toki-erakundeei nolako onurak ekarriko dizkieten azalduko diete.

Cederna Garalur Elkarteak ohar bidez adierazi duenez, «energia ekoiztea eta energia-kontsumoa ekonomia zirkularraren zutabeetako bi dira». Energia kontsumoaren ohiko eskeman, «autokontsumoak etxeko kontsumoan energia berriztagarria sartzea ahalbidetzen» duela oroitarazi du, eta honela gaineratu du: «herritarrei energia independenteki sortzeko aukera ematen die modu jasangarrian eta ekonomikoan, tokian tokiko energia-iturrien alde eginez: biomasa, eguzkia, haizea edo jauzi hidraulikoak, kasurako».

Hitzaldia udaletxean eskainiko dute, 19:00etan eta David Gordejuelak emanen du, NASEIn lan egiten duen eta energia efizientzian aditua den ingeniariak. NASEI Cederna Garalur Elkartearen energia efizientziako zerbitzuaren enpresa aholkularia da.

Izen-ematea
Solasaldira joan nahi dutenek 607 67 93 77 telefonora deituta, Cederna Garalur Elkartearen web-orrialdean (www.cederna.eu) eta bidasoa.admon@cederna.es helbidera mezua bidalita eman dezake izena.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun