Nafarroako laugarren txapela
Iruñean denboraldiko hirugarren txapela jantzi dute Onsalo eta Astiazaranek. Pozik daude lortutakoarekin baina «erruz sufritu» dutela aitortu dute. Plaza ezaguna dute Iruñekoa, lau aldiz izan dira irabazle bertan, baina hori gaurkoan ez omen da izan lasaitasunerako arrazoia: «hasi aurretik urduri geunden, baita proban zehar ere. Euskal Herrikoan oso estu ibili ginen eta hori gogoan genuen. Bagenekien Iraizoz ahizpak irabaztera etorriko zirela, dena ematera eta hala izan da. Azken kortera arte ez zegoen ezer erabakita». Beste bikoteak «lan oso gogorra» egin duela diote eta gaurkoak argi erakutsi diete: «bigarrenak hor daude eta orain arteko emaitzak lortu nahi baditugu, ezin dugu lo hartu». Txapelak soinean, unean uneko egoerara moldatuta «hobetzen joatea» dute heldu den urterako erronka.