Pesta giroa da nagusi azken aldian Areson. Aurreko asteburuan San Juan bezperako ekitaldiak ospatuko zituzten eta honetan, berriz, sanpedroak izango dituzte. Ostiralean, ekainak 28, 17:00etan meza izango da eta ondoren merienda. 18:00etan lagunartekoak eskean aterako dira herriko etxeetan barna. Erronda bukatuta, 21:00 aldera lagunartekoek afaria izango dute.
Biharamunean, bezperako ajea soinean izanagatik, ez dira gazteak berandu arte ohean geratuko. 09:00etan egina dute gosaltzeko hitzordua eta handik, 11:00 aldera, baserrietako eskean abiatuko dira trikitilariekin. 18:00etan Berrobiko Txalo-Talo antzerki taldeak emanaldia eskainiko du. V. Antzez Motz lehiaketan hiru sari eskuratu berri ditu taldeak Konplizeak lanarekin eta hain juxtu, lan horren moldaketa bat taularatzeko asmoa dute. 19:00etan sagardo dastaketa eta pintxoak izango dira eta 21:30 aldera herri-afaria. Afalondoa Kenbat musika taldeak girotuko du.