Artikutzako balio naturalaz hitzaldia eskainiko dute ekainaren 8an Goizuetan

Ttipi-Ttapa 2019ko eka. 6a, 06:30
Artikutzarako sarbidea egokitu du Goizuetako Udalak eta seinaleak jarri dituzte.

Artikutzako hustuketa-prozesua ikertzen ari den Arturo Elosegi izanen da hizlari larunbatean 11:00etan

Artikutzak duen balio naturala aberatsa da eta horren harira, hitzaldia eskainiko dute ekainaren 8an, larunbatean, Goizuetako Udaletxeko ganbaran ganbaran. 11:00etan zehaztu dute hitzordua. Euskal Herriko Unibertsitateko Zientzia eta Teknologia Fakultatean, Landareen Biologia eta Ekologia sailean, irakasle katedraduna den Arturo Elosegi izanen da hizlari. Beste irakasle batzuekin batera, Artikutzako hustuketa-prozesua ikertzen ari da.

Artikutzarako sarbidea egokitu du Udalak

Goizuetako Udalak Artikutzarako sarbidea egokitu du, eremua baliabide turistiko bezala baliatzeko. Zabortegia zegoen tokitik hasita, 900 metro inguru asfaltatu dituzte eta Leitza-Goizueta-Hernaniko NA-4150 errepidean bidea adierazteko seinaleak jarri dituzte.

Lanek guztira 104.333,33 euroko gastua izan dute baina Gobernuari eta Landa Garapenerako Programa Europarrari esker, Nafarroako Landa Garapenerako programatik 50.000 euro jaso dituzte. Horrela bada, Udalak 54.333,33 euro baliatu ditu. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun