Lehen finalerdian Leire Garai eta Leire Etxanizek, euren taldeko lehenak izan ziren partidarik galdu gabe, Maite eta Olatz Ruiz de Larramendi izeba-iloben aurka jokatuko dute. Lau eta erdikoan txapelaren borrokatik kanpo geratu ondotik, Etxebarriakoa gogoz biziz ari da eta binakako bere hirugarren garaipena nahi du. Leire Garai eta Olatz Ruiz de Larramendi gazteek, euren aldetik, berme guztiak ematen ari dira atzeko koadroetan.
Bertze finalerdian, Patri Espinar-Miriam Arrillaga, Leitzako Iera Agirre eta Olatz Arrizabalagaren aurka ariko dira. Azken hauek partidarik galdu gabe heldu dira. Usansolokoak, lau eta erdiko txapeldunak, ez zuen txapelketa nahi bezala hasi, baina hortik aurrera joko maila bikaina berreskuratu du eta Miriam Arrillaga gazteak ere bikain lagundu dio. Iera Agirre eta Olatz Arrizabalagak, euren aldetik, akatsik gabeko bikote indartsua osatzen dute eta txapelaren bila datoz.
Promoziokoak Legazpin
Aste bukaera ekitaldiz beteta dator, larunbat arratsaldean (17:00) promozio mailako finalerdiak jokatuko baitira Legazpiko Urbeltz pilotalekuan. Martxoaren 17an Zumarragako Beloki pilotalekuan bukatuko den bidaia zoragarriaren azken aurreko geldialdia izanen da Legazpikoa. Errenteriako finalerdia eta Zumarragako finala ETB-k zuzenean emanen ditu.