Eneritz Arotzena, Saioa Taberna eta Juanjo Indakoetxeak osatutako hirukotea suertatu da garaile herria hobe ezagutzea helburu duen norgehiagokan
Herria hobeki ezagutzeko, Goizuetari buruzko galderak, ariketak, probak… bildu dituen Katarrapikaka! lehiaketa egin zuten azaroaren 15ean, larunbat arratsaldean Herriko Etxeko Ganbaran, Goizuetako Euskara Zerbitzuak eta Goizuetako Udalak antolatuta. Parte hartu zuten hiru hirukoteen artean, Eneritz Arotzenak, Saioa Tabernak eta Juanjo Indakoetxeak osatutakoa suertatu zen garaile eta 300 euroko saria eskuratu zuten.
Bigarren sailkatuak.Iban Eskudero, Hodei Lujanbio eta Maria Eskudero izan ziren eta hirugarrenak, hirukoterik gazteena, Janire Bakero, Amalur Narbarte eta Uxue Mutuberriak osatutakoa.
Oso giro polita izan zen Goizuetako Udaletxeko ganbaran. Bertaratutakoek Goizuetako kultura ondareari buruz gehiago ikasteko aukera izan zuten jolasenen bidez: Goizuetako baserri eta etxeen izenak, Goizuetako hitzak, tresna zaharren izenak... Lehia azken momenturarte egon zen. Baina azkenean, talde berdeak irabazi zuen 300 euroko saria.
