Aranon inoiz ez da pediatrarik izan eta zerbitzu hau Goizuetan jaso izan dute astean behin bi herrietako ehun bat haurrek. Nafarroan bezalaxe, ordea, Estatu osoan ere arazoa omen da pediatra eskasia, eta arazo hori dela eta, zaila dirudi Goizuetara, eta oraindik zailagoa Aranora, pediatra bat ekartzea. Baina,hau horrela izanda ere, Aranoko familiak Goizuetako protestak babestuz, pediatra zerbitzua Goizuetan mantentzea eskatzen dute, Aranotik Goizuetara 20 minutu direla kontuan izanda, hau bera nahikoa bide eta denbora badela salatuz, hain oinarrizkoa den zerbitzu batera aukera duina izateko.
Errealitate hau horrela bada ere, Aranok Gipuzkoarekin duen gertutasunak beste errealitate bat azaleratu du oraingoan ere. Horregatik, familia batzuk, Aranoko Udalari eskatu diote, Nafarroako Gobernuko Osasun Zerbitzuarekin negoziaketa bide bat ireki dezala, gaur egun Osakidetza eta Osasunbidearen artean dagoen hitzarmenean, Gipuzkoako anbulategietan pediatra espezialitatea eskatzeko aukera izan dezaten, hala beharko luketen zonaldeko familiek.