Lehen mailako Euskal Herriko aizkora txapelketako finaletik kanpo gelditu dira Rekondo eta Saralegi

Ttipi-Ttapa 2018ko ira. 17a, 10:28

Urriaren 28an Iruñeko final nagusiak lehiatuko den seikotea, Lakuntzako kanporaketaren ondotik.

Hamaika aizkolari aritu ziren igande eguerdian Lakuntzan, urriaren 28an Iruñean jokatuko den finalerako sei txartelen bila

Euskal Herriko lehen mailako aizkora txapelketaren kanporaketa jokatu zen Lakuntzako pilotalekuan, igande eguerdian. Hamabi aizkolari aritzekoak ziren, urriaren 28an Iruñeko Labrit pilotalekuan jokatuko den finalerako sei txartelen bila, baina min hartutako Ugaitz Mugertza mutrikuarrak ez zuen parte hartzerik izan. Jon Rekondo eta Ruben Saralegi leitzarrak ziren eskualdeko ordezkari bakarrak eta segundo eskas batzuengatik, finaletik kanpo gelditu ziren.

Otsagabiko Iker Vicente izan zen bi kanaerdiko, bi 60 ontzako eta bi oinbiko mozten bizkorrena, 20 minutu eta 35 segundo behar izan baitzituen. Berekin batera, Mikel Larrañaga gipuzkoarra (20:47), Aitzol Atutxa bizkaitarra eta azken lau urteotako txapelduna (21:17), Joseba Otaegi gipuzkoarra (22:26), Eneko Otaño gipuzkoarra (22:31) eta Iñaki Azurmendi gipuzkoarra (23:00) sailkatu ziren Iruñeko finalerako. Hamabi segundo eskasengatik finaletik kanpo gelditu zen Jon Rekondo leitzarra (23:12) eta 38 segundorengatik Ruben Saralegi (23:38), zazpigarren eta zortzigarren, hurrenez hurren. Bederatzigarren Julen Alberdi gipuzkoarra izan zen (23:40), hamargarren Jon Irazu gipuzkoarra (28:33) eta Xabier Zaldua gipuzkoarra (29:28).

Kirola Leitzaldea Leitza

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun