Lasterketa honek 67 kilometro luze eta 7.200 metroko gainbehera du. Leitzan hasi eta bukatzen da, Araitz-Betelu, Larraun eta Lekunberritik pasatu ondoren, tartean Irumugarrieta (1.431 m) eta Ireber (1.208 m) igoko dituzte. Mendiz inguratutako herriak dira guztiak, eta eskualde osoan kirol izaera oso errotua dago.
Duela 6 urte abiatutako mendi-lasterketa honek lortu duen arrakasta nabarmena da, parte hartzaile asko eta izen handikoak etorri izan dira: Iker Karrera amezketarra, edota Elena Calvillo Beasaindarra esaterako.
Distantzia luzeko mendi-lasterketa honek 10 anoa gune izanen ditu ibilbidean zehar eta igaro beharreko 6 kronometraje puntu.
EH mendi erronka ez da mendi lasterketa soila, aldarrikapen lasterketa bat baizik: euskal mendizaletasunaren nortasuna, mendi lasterketa, lurraldetasuna, ofizialtasuna, Plazaola natur gunea eta euskara sustatzea du helburu.
Egitaraua
06:00etatik 07:00etara bitarte dortsalak banatu eta Joan Mari Torrealdai omenduko dute. 08:00etan plazatik abiatu eta Pagozelai, Gaintza, Albi, Putzuzar, Lekunberri eta Idiazabalen barna, hasierara itzuliko dira. Lehen korrikalariak 14:00 aldera iritsiko dira eta 15:00etatik 21:00etara lasterkariei paella eskainiko zaie. Sari banaketa 20:00etan eginen dute.
Bezperatik mugimendua
Egun handia larunbatean izanen bada ere, bezperatik mugimendua somatuko da herrian. 17:00etatik 19:30era bitarte dortsalak banatuko dituzte eta 17:00etatik 21:00etara kirol postuak izanen dira plazan. Bien bitartean, 18:30ean Salomon Sense Ride zapatillak probatzeko zazpi kilometroko ibilaldia eginen dute. Ondotik, 19:15ean El hombre que empezó a correr dokumentala izanen da ikusgai, Leitzako Batzar Aretoan.