Leitzaldeko eskolen arteko zita dute maiatzaren 26an Areson

Ttipi-Ttapa 2018ko mai. 22a, 06:58
Jendea festara animatzeko bideo bat egin dute

Larunbaterako egitarau zabalaz gain, bideoa ere prestatu dute Nazabal eskolan

Aresoko Nazabal eskolako haur, guraso eta irakasleei dagokie aurten eskolen arteko topaketak antolatzea. Festaren hemeretzigarren edizioa izango da eta egun osoko festan, Arano, Areso, Goizueta eta Leitzako eskolakoak jai giroan elkartzea, aisialdi osasungarria bultzatzea, Areso herria ezagutzea eta  berdintasunean eta errespetuan oinarritutako harremanak lantzea izango dute helburu. Horretarako, egitarau zabala eta askotarikoa prestatu dute.

 

Egitaraua
Larunbatean 11:00etan emango diote hasiera festari bisitariei ongi etorria eginez plazan. Segidan, joko eta tailerrak izango dira. 13:30ean topaketetako kanta abestu eta dantzatuko dute eta 14:00 aldera mahaien bueltan bilduko dira,  bazkaltzeko (paella, postrea eta kafea). Bazkalondoan euskal kantuen txanda izango da eta 16:30ean festa herrian barna zabalduko dute, trikitilarien erritmoan. 17:30ean indarrak berreskuratzeko txokolate jana egingo dute bizkotxoarekin eta 18:30ean emango diote bukaera festari. Antolatzaileek bisitariei autoa konpartitzeko gonbidapena egin diete eta festako joko, kantaldi… eta bestelako ekintzetan parte hartzekoa.


Bideoa
Parte hartzeko deia eginez, bideo berezia prestatzen ere aritu dira eskolakoak. Maiatzaren 7an egin zituzten grabazioak eta eskolako txikiak egunean bertan dantzatuko duten dantza dantzatzen ageri dira. Bideoa eskoletan eta gurasoen artean zabaltzeko asmoa dute, denek ikasi eta elkarrekin dantzatzeko.

Erlazionatuak

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun