Goizuetako Txinoko fiestak giro ederrean joan dira aurten ere

Ttipi-Ttapa 2018ko mai. 7a, 10:24

Oroitz Zurutuzak bota zuen txupinazoa, Irisarrikoen izenean

Asteburu honetan ospatu dira Txino auzoko fiestak Goizuetan eta urtero bezala mundialak izan dira. Bertso saioa eta mus txapelketa ostiralean eta haurren krosa, txupinazoa, sokatira, herri bazkaria eta bazkalondoko animazioa izan zituzten larunbatean. Argazkiak: Felix Loiarte

 

Ostiralean Jexux Mari Irazu eta Agin Laburu bertsolariak aritu ziren Zubiondo tabernan eta bertso zaleek bizitasun handiko saioaz gozatzeko aukera izan zuten, festei hasiera emanez.

Ondoren, bertsolariei txanda eginez, Mus txapelketa jokatu zen Zubiondon bertan eta iaz bezala, aurten ere Josu Narbarte eta Bixente Callejón aurtengoan ere txapeldun izan dira. Txapeldun ordeak, berriz, Aritz Loiarte eta Iban Eskudero izan dira.

Larunbat goizean haurren krosa egin zen, animazio handiarekin. Ondotik, txupinazoa bota zuen Oroitz Zurutuzak. Urtero bezala, auzoko etxe bateko ordezkariari uzten zaio lehen suziria pizten eta aurten Irisarrikoei suertatu zaie. Auzoko dragoia han-hemen ibili zen kalejiran. Txino auzoko eta herriko tiralarien arteko sokatira saio inoiz baino borrokatuagoa izan zen eta horren erakusgarri, soka bera puskatu zutela tiraldian. Bi taldeetako tiralariak hankaz gora joan ziren eta horrek, inork minik hartu ez zuela ikusi ondotik, ikusleen eta kirolarien parre algarak sorrarazi zituen. Herri bazkarian eta bazkalondoan ere giro ederra izan zen, Papo kubatarrarekin eta Irati eta Leireren doinuekin egindako dantzaldiarekin.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun