Autobabes ikastaroa eskainiko dute maiatzaren 12an Leitzan

Ttipi-Ttapa 2018ko mai. 5a, 11:45
Hamabost urtetik gorako edonori bideratutako ikastaroa da

Maiatzaren 7, 8, 9 eta 10ean eman daiteke izena, kiroldegian

Heldu den larunbatean, maiatzaren 12an, hamabost urtetik gorakoentzat Autobabes ikastaroa eskainiko dute Leitzako Udal Kiroldegian. Meatxuzko egoera baten aurrean beharrezkoa den erantzun emozionalerako eta autokontrolerako bitartekoak izanen dituzte langai. Hala, autobabeserako teknika erraz eta eraginkorrak ikasiko dituzte.

Ikastaroa maiatzaren 12an, larunbatean, eskainiko da, 10:00etatik 13:00etara bitarte, kiroldegian eta Fernando Burguik eta Juan Maritorenak, Karate kirol teknikariek, bideratuko dute. Plazak mugatuak izango dira, izen-ematea maiatzaren 7an, 8an, 9an eta 10ean egin ahal izanen da, kiroldegian. Bazkideek 5 euro ordaindu beharko dituzte; bazkide ez direnek, berriz, 10. Antolatzaileek ikastaroan parte hartzeko ez dela baldintza fisiko berezirik behar jakinarazi dute.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun