Txino auzoko fiestak ospatuko dituzte asteburu honetan Goizuetan

Ttipi-Ttapa 2018ko mai. 3a, 06:52
Txinoko dragoia dantzan jarriko dute aurten ere Goizuetan.

Hamabosgarren urtez bi egunetarako ekitaldi asko prestatu dituzte herriko hainbat eragilek elkarlanean

Gazte Asanbladak, Guraso Elkarteak, Ezker Abertzaleak, Umore Ona Elkarteak eta herriko gazteek elkarlanean, Txino auzoko fiestak antolatu dituzte beste urte batez Goizuetan. Aurtengoa hamabosgarren edizioa izanen da eta aurrekoetan bezala, zubiaren beste aldean ez da musika, jai-giro eta ikuskizunik faltako. Bi egunez, maiatzaren 4an eta 5ean, ekitaldi ugari prestatu dituzte. 

 

Maiatzak 4, ostirala

Ostiral ilunabarreko bertso-saioarekin hasiko dira fiestak. Aldi honetan, Agin Laburu eta Eli Pagola gonbidatu dituzte eta 20:00etan beraien txanda izanen da. Gauean, berriz, 22:30ean, dagoeneko ohikoa bihurtu den mus txapelketa jokatuko dute Zubiondo tabernan.

 

Maiatzak 5, larunbata

Larunbatean jarraituko du auzoko jai-giroak. 11:00etan haur eta gaztetxoen krosa eginen dute, eta 12:00etan botako dute fiestei hasiera ofiziala emanen dien txupinazoa. Ondotik, dragoia aterako dute eta trikitilariak ere kale bazterrak alaitzen ibiliko dira. 13:00etan sokatiran ariko dira herritarrak eta 14:30ean herri bazkaria eginen dute. Txartelak Amaiarenean salgai daudela jakinarazi dute antolatzaileek. 18:00etan Papo kubatarrak ikuskizuna eskainiko du eta ondotik, dantzaldia izanen da Irati eta Leirerekin.

 

Jan-edana auzoan

Fiesta den tokitik mugitu gabe, jatekoa eta edatekoa izanen da auzoan berean. Ostiral arratsalde eta gauean, eta larunbatean, Zubi-Ondo taberna irekia egonen da. Larunbat eguerdian eta arratsaldean bajera ere irekiko dute. 

Gizartea Leitzaldea Goizueta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun