Guztira 30 parte-hartzaile espero dira. Animalia eta hegaztien erakusketaz gainera, udazken sasoiko produktuez osatutako salmenta postuak egonen dira: barazkiak, gazta, babarrunak, eztia...
Azoka horren helburu nagusia bertako produktuei eta ekoizleei dagokien balioa eta lekua ematea da. Hala, herritarrek bertako produktuak kontsumitzeko ardura hartuz, guztion onerako izanen den elikadura eredu bat eraiki nahi dute.
Leitza kontsumituz
Azken urtean, dinamika ugari jarri dira martxan elikadura burujabetza eta bertako produktuen kontsumo, ekoizpen eta salmenta bultzatzeko asmoz; Leitza Kontsumituz, kasu.
Leitza Kontsumituz prozesuaren helburu nagusia, hainbat eremutan egiten ari ziren hausnarketa eta ekintzekin bat eginez, Leitza zein Aresorako prozesu partehartzaile bat osatzea da. Orain artean eginiko bilkuretan, Leitza eta Aresoko galdeketek eta ikerketek emandako emaitzen inguruan hausnartzeko, 50 bat lagun bildu dira. Azken urratsa azaroaren 2an egitea aurreikusi dute. Hala, azoka bezperarako osaturik eta jendeartean zabaltzeko prest egonen litzateke.
Laborantza Proiektuak ezagutzen
Urriaren 21ean LeitzEko Kontsumo taldeko hainbat kidek eta Leitza eta Aresoko Udaletako ordezkariek Euskal Herriko Laborantza Ganbarako proiektuak bertatik bertara ezagutzeko aukera izan zuten. Ainhizen jaso zituzten proiektuaren inguruko xehetasunak eta hainbat etxalde bisitatzeko aukera ere izan zuten.