09:00etan Leitzako plazatik abiatuko dira eta 42 kilometroak egin ondotik plazan izanen dute helmuga. Plazaolatik barna eginen dituzte lehenbiziko kilometroak baina hortik aurrerakoak Leitzako kaxkoak zeharkatuz osatu beharko dituzte. Ez da proba lehiakorra eta guztia mendiko xenda eta basoetan barna izanen da, errepiderik ia zapaldu gabe. Bidean, edariak eskainiko dizkiete parte-hartzaileei bi puntutan, Basakabin eta Uitziko gainean eta helmugan ere ez dira jan-edanak faltako. Parte-hartzaileen erosotasunari begira, dutxak, bizikletak garbitzeko mangerak, aparkalekuak... prestatuko dituzte.
Herrian bertan ere, bizikleta gainera igo gabe, izanen da gozatzeko aukera. 11:00etatik aurrera Trial Sin erakustaldia eskainiko dute Iker Gomez, Iker Rodriguez eta Unai Gomezek.