Funtzio-anitzeko aretoa
Udalak dagoeneko zinean egin beharreko moldaketa lanen memoria (aurreproiektua) aurkeztu du Nafarroako Gobernuko Kultura Zuzendaritzan.Garrantzia handia ematen dio Udalak gaur egun zine aretoa kokatzen den eraikinari: «garapen sozial eta kulturalerako erreferentea izan da herrian. Arazo asko ditu irisgarritasun arauak betetzeko, hezetasunak ere kalteak eragiten ditu urtero eta isolamendu termiko ezak energia galera handiak sortzen ditu. Erreforma eta moldaketa lanak eginez gero, gaur egun dituen arazoak konpontzeaz gain, aukera dago zine aretoari beste izaera bat eman eta funtzio-anitzeko areto bihurtzeko.
Nafarroako Gobernuan aurkeztutako aurre-proiektuak eraikina kanpotik eta barrutik hobetzeko proposamenak biltzen ditu: teilatua konpondu, fatxadak eta kanpo arotzeria moldatu, desnibelak kendu, eraikinaren distribuzioa egokitu, ibilbideak egokitu eta arrapalak eta igogailua jartzea. Gainera, instalazioak eguneratzeko ere probestu nahi dute, grada teleskopikoak eta proiektore digitala jarriz.
1,2 milioi euroko aurrekontua
Aurkeztutako proposamenaren aurrekontua 1,2 miloi eurokoa da eta egitasmo hau bideragarria izateko beste instituzioen parte hartzea «ezinbestekoa» dela azaldu du Udalak «hori dela eta, hainbat lan aurreratu ditugu: azterketa teknikoa eta aurreproiektua egin, herriko errealitate kultural eta soziala jasotzen duen txostena osatu...». Beste instituzio batzuei ere elkarlana eskatu diete.
Sinadurak non?
Proiektuari bultzada emateko, orain herri ekimenetik sinadura bilketa abiatu dute herri aretoaren alde. Kanpainarekin bat egin nahi duenak, Astiz eta Maimur liburudendetan, Ogiberri, Zortziko eta Atseden-Gozo okindegietan, igerilekuan, Udaletxean eta Osasun Etxean sinatu dezake, herritar guztientzako izanen den eraikinaren alde eginez.
