Plazaola aldizkariko azal lehiaketa martxan dute Leitzan

Ttipi-Ttapa 2017ko eka. 9a, 11:13
Plazaolarako lanak aurkeztea da Santiburtzioak hurbiltzen ari direnaren seinale.

Aldizkarirako idatziak ere ekainaren 30era arte aurkez daitezke

Leitzako Santiburtzioak iragartzen dituen Plazaola aldizkaria prestatzeko garaia ailegatu da eta hori osatzen joateko, martxan da azal lehiaketa. Irabazleentzat sariak izanen dira. 16 urtetik beherakoak opari bat jasoko du eta 16 urtetik gorakoetan irabazle izanen denak, 150 euroko saria. Lanak ekainaren 30a baino lehen aurkeztu beharko dira Maimur liburu­dendan edo Aurreran. 

 

Parte-hartzaile bakoitzak nahi adina lan aurkeztu ditzake: margo, marrazki, argazki edo bestelakoak. Aurkeztutako lanek, gutxienez A3 tamaina izan beharko dute eta lanari atzekaldean izenburu edo izengoiti bat jarri behar zaio. Horrekin batera, gutunazal itxi bat aurkeztu beharko da, egilearen datuak bertan sartuz.

Lanak aurkezterakoan 16 urtetik beherakoek Plazaola-Leitzako aldizkaria 39. zenbakia jarri beharko dute eta 16 urtetik gorakoek Leitza 2017-Tiburtzio Donearen Pestak- 39. zenbakia.

 

Bozketa

Lehiaketara aurkeztutako lan guztiak ikusgai jarriko diztuzte eta herri­tarrak izanen dira beren botoen bidez irabazleak aukeratuko dituztenak. Sari banaketa txupinazoaren ondoren izanen da Udaletxeko batzar aretoan.

 

Idatziak

Plazaola aldizkaria osatzeko herritarrak ida­tziak bidaltzera ere animatu nahi dituzte. Istorioak, kontuak, ipuinak, kritikak, agurrak, txisteak, olerkiak… Lanak aurrerake@hotmail.com helbidera bidali edo Aurrerako buzoian utzi. Ekainaren 30era arteko epea izanen da, eskertuko dute garaiz ibiltzea.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun