Garrantzia handia ematen dio Leitzako Udalak gaur egun zine aretoa kokatzen den eraikinari. Izan ere, garapen sozial eta kulturalerako erreferente izan baita herrian. Gaur egun, arazo asko ditu irisgarritasun arauak betetzeko, hezetasunak ere kaltea eragiten ditu urtero-urtero eta isolamendu termiko ezak energia galera handiak sortzen ditu.
Erreforma eta moldaketa lanak eginez gero, gaur egun dituen arazoak konpontzeaz gain, aukera dago zine aretoari beste izaera bat eman eta areto funtzio-anitzeko bihurtzeko.
Leitzako Udaletik ez dute azpiegitura berri eta handikietan dirua gastatzerik nahi. «Orain arteko ibilbidean erakutsi dugun moduan, dauzkagun baliabideak ahalik eta modu eraginkorrenean moldatu eta baldintza egokietan edukitzea da gure helburua», dio udalak ohar batean. Betiere, herritarren oinarrizko zerbitzuak aztertu eta lehentasunen arabera jorratuta.
Nafarroan, tamaina bereko herri bakarra edo bakarrenetakoa da Leitza garapen sozial eta kulturala aurrera eramateko funtzio anitzeko aretorik ez duena. Horrelako areto batek, herrian betidanik egon den kultura, sormen eta ekimen grinak asetzeko balioko lukeela uste du Udalak.