Gizonezkoetan, Ramosen atzetik, Arkaitz Muños bilbobtarrak (7:00:17) eta Manttaleko Unai Santamaria hernaniarrak (7:07:07) osatu zuten podiuma.
Emakumezkoetan, Guemberen ondotik, Alkizako Monica Grajera izan zen bigarren (8:51:24) eta Amaia Ochoa de Alda donostiarra hirugarren (9:40:02).
Eskualdeko korrikalariei dagokienez, Leitzako Iban Bengoetxea Cousillas izan da bizkorrena, hamabigarren sailkatu baita (7:37:55). Xabier Maritxalar lesakarra hemeretzigarren izan da (7:43:49) eta Mikel Altadill leitzarra hogeita batgarrena (7:45:40).
Ibilbidearen barrenean egin den Kilometro Bertikalean, berriz, Uharte Arakilgo Jose Luis Beraza (00:54:37) eta Irene Guembe Ibañez bera (1:12:50) izan dira bizkorrenak.
Mendi Erronka Leitzako plazan hasi eta bertan bukatu da, 67 kilometroko ibilbidea osatu ondoren. Leitza –Pagozelai –Gaintza –Irumugarrieta -Unagako Putzua – Putzuzar -Iribaseko iturburua –Lekunberri –Iontza –Idiazabal -Jaundegiko borda gurutzatu dituzte, berriz ere Leitzara itzultzeko. Bidean 5 kontrol gune igaro eta tartean jan-edanerako 9 anoa gune izan dituzte indarrak hartzeko. 7.200 metroko gainbehera du proba honek eta tartean Kilometro Bertikala ere igaro behar izan dute Irumugarrietako igoeran, 3.600 metroko gainbehera positiboari aurre eginez. Irumugarrieta da hain zuzen ibilbideko punturik altuena 1.431 metrorekin eta Arribe baxuena 222 metrorekin.
Txapelketa konbinatua
Aurten, Euskal Herriko Mendi Federazioak Txapelketa konbinatua antolatu du, 3 proba ezberdin prestatuz. Apirilean izan zen lehenbizikoa, Aloñako proba lineala. Larunbatekoa bigarrena Euskal Herria Mendi Erronka Ultra Txapelketa. Eta irailean izanen da hirugarrena Beriaingo proba bertikala. Gaur Mendi Erronka irabazi dutenek, Alvaro Ramosek eta Irene Guembek txapelketa konbinatuko txaleko bana jaso dute Mendi Federazioaren eskutik.
Omenaldia
Mendi lasterketari ekin aurretik, EH Mendi Erronkako antolatzaileek omenaldia eskaini diote Juan Maria Feliú Dord mendizaleari. Garaikurra eman diote eta Leitzako Aurrera dantza taldekoek aurreskua dantzatu diete. Haren ibilbidea eta mendiarekin zein Euskal Herriarekin duen konpromisoa eskertu nahian eman diote aurtengo garaikurra, eta horrekin mendia eta Euskal Herria sustatzeko erronkan egindako ekarpena eskertuz.
Azpimarratzekoa eta eskertzekoa da egun hauetan lanean aritu diren laguntzaile guztien borondatea, ezinbestekoa izan baita haien parte hartzea guztia behar bezala prestatzeko. 450 boluntariok, bertakoek zein eskualdeko herritarrek, bat egin dute lasterketa honen antolakuntzan, eta guztiak aritu dira lanean gaur egun osoan, nola aurreko egunetan.