Urteko hitzordu garrantzitsuena igandean Artikutzan

Ttipi-Ttapa 2016ko abu. 26a, 08:33

Urte osoan egun batez baino ez dituzte irekitzen autoz Artikutzara sartzeko ateak. Abuztuaren 28an izaten da hori, San Agustin egunean. Aurten igandearekin tokatu da eta eguraldiak laguntzen badu, jendetza elkartuko da. Urtero bezala, egun osoan hainbat ekitaldi prestatu dituzte.



Artikutzako San Agustin baselizan hasiko da festa eguna, 11:00etako mezarekin. Egi Eder otxotearekin izanen da. 11:30ean pilota partidak jokatuko dituzte, paxaka eta eskuz. Arratsaldean, berriz, 17:00etan herri kirol saioa izanen da: aizkolariak, txinga  eramaileak, koxkor biltzaileak eta harri-jasotzaileak. Eguna borobiltzeko, 19:00etatik aitzinera, dantzaldia izanen da Xabi Dantzaleku DJarekin.

Horrez gain, egun osoan artisauen lanak ikusgai eta salgai izanen dira, eta taloak dastatzeko aukera ere izanen da. Bi ostatua ere paratuko dituzte, jateko eta edateko nahikoa izan dadin.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun