Arano ezagutu zuenean «herriarekin maitemindu» zela esan digu Erramun Galparsorok «pakea, mendiko giro hori... Herria eta herriko jendea ere atsegina egin zait beti. Oso harrera ona izan genuen. Oso eroso sentitzen gara bertan: lasai, goxo...». Duela 15 urte inguru joan ziren Donostiatik Aranora bizitzera «bi ume genituen orduan, 5 eta bi urtekoak eta Donostian pisu batean sartu beharrean Aranon etxe zahar bat zegoen salgai, hura hartu genuen eta obra egin genuen». Orain lan arrazoiak tarteko Donostiara itzuli beharra izan dute «baina ahal dugun guztietan joaten gara Aranora; bertakoak sentitzen gara eta».
Bere ustez txoko eder asko ditu Aranok, baina batez ere udan Mendatze ingurura joatea maite dutela esan digu «Mendatze erreka bazter bat da, oso oso polita dena. Bainuak hartzen ditugu udan, dena basoz inguratua dago. Hantxe oso gustura egoten gara».
Santioak ere barru barrutik bizi dituzte «udan beste plan batzuk baditugu ere, nahi eta nahi ez Aranon egon beharreko egunak dira santioak. Laguntzen, parrandan... gure umeak suelto suelto ibiltzen dira». Arano herri ttiki bat izanik, «jendea behar izaten da gauzak antolatzeko eta ahal dugun moduan laguntzen dugu. Umeentzako jokoak prestatu, bertako produktuekin feria egin... gustura bizi ditugu».
«Herrigintza proiektuari esker umeak konturatzen dira bizi diren tokia ez dela edozein»
Aranon azken urteetan egiten ari diren herrigintza eskolan ere parte hartzen dute Erramunek eta bere familiak eta asko ikasi dutela diote «memoria bestela nola gorde? herrian dugun ondarea, pasaia, historia... ezagututa umeak konturatzen dira bizi diren tokia ez dela edozein». Azken tailerrean adibidez, «herriaren etorkizunari buruz gogoeta interesgarriak bildu genituen. Ohartu ziren, herriak gabezia batzuk izan arren, balio handia duten beste gauza asko dituela; haurrek duten autonomia hori adibidez». Erramunek argi du behintzat, «asteburuan egon litekeen planik onena Aranora joatea da guretzat. Neguan bada sua piztu eta goxo goxo egon eta udan leihoak ireki eta beste soinu eta usain batzuk ditu».