Amaia Nausiak hitzaldia eskainiko du Nafarroako emazteetaz egin duen azken lanaz. 500 urteko doktrinatze femeninoari buruz hitz eginen du (1512-2012).
Amaia Nausia Pimoulier-ek, (Iruñea, 1982), Nafarroako Unibertsitateko Historia doktoreak, Erdi Aroko emazte alargunen eta alarguntzaren egoerak aztertu ditu bere tesian: Dolu eta biziraupenaren artean: alargunak eta alarguntzea Nafarroa Modernoan (XVI eta XVII).
Bere ikerketen helburuak izan dira emazteen bizitzeko, pentsatze eta sentitzeko moldeen ulertzea Garai Modernoan; ulertzea inposatua zitzaioten bizi moldetik apartatzea menturatzen ziren emazteen xedeak zoin ziren. Beste gai batzuk ere jorratzen ditu ala nola sorginkeria, amaren irudia edo emazteen bazterketa.
«Birjina-puta dikotomiak egungo gizartean segitzen du»
Bi eredu kontrajarriren arabera eraiki izan da andreen izaera; doktrinatzearen prozesu historikoan. Historian zehar, emakumeok bi eredu horietan banatu dira: birjina ala puta, Maria ala Eva. Bata, ideala, andreak nolakoa izan behar zuen ezartzen zuena. Bestea, emagaldua, idealari jarraitzen ez ziotenentzat. Ez zegoen erdibiderik.
Birjina-puta dikotomia egungo gizartearen pentsamoldean segitzen duela defendatzen du Nausiak: emakume batek bere sexualitatearekin libreki jokatzen duenean, berehala epaitzen dugu, lausoagoa den arren. Baina diskurtso ofizialetan, oso agerikoa izan zen altxamendu militarraren ondorenera arte: Pilar Primo de Riveraren diskurtsoak orain 50 urtekoak dira, eta Juan Luis Vivesek duela 500 urte idatzitakoen oso antzekoak dira.