Aipagarria da Salaberriaren garaipena, lehenbiziko urtea baitu gazte mailan. 1999an jaioa da, 16 urte bertzerik ez ditu, baina goizuetarrak erakustaldia eskaini zuen bera baino urtebete zaharragoa den Etxeberria menperatuta.
Partida gogorra jokatu zuten, 270 pilotakadakoa. Salaberriak 4 tanto egin zituen sakez eta Etxeberriak 2. Hasiera berdindua joan zen, eta bederatzinakoa izan zen azken berdinketa. Hor, 9-14 aurreratu zen goizuetarra, 11-14 hurbildu zen Huartekoa, baina azken lau tantoak segidan egin zituen Salaberriak.
Aipatzekoa da Salaberriak buruz buruko gazte mailako finala ere jokatu zuela duela hilabete eta erdi, baina galdu egin zuen Zugarraldeko Enaitz Antso oronoztarraren kontra. Hain zuzen, Guillermo Mazo txapelketaren finalaren aitzinetik, hirugarren posturako norgehiagoka jokatu zuten Enaitz Antsok berak eta Iosu Eskirotz taldekideak. Azkenean, Antsok 18-10 irabazi zuen eta hirugarren postua eskuratu zuen.