Goizeko 10etan plazatik abiatuta, ibilbide berezia osatzeko aukera izan zuten aranoarrek, Suhar Arkeologia Elkarteko, Ander Arrese, Beñat Iturrioz, Josu Zumeta eta Xabi Cuetaren eta Eureka Solucioneseko Iñaki Garijo zahoriaren azalpenak aditzeko aukera izan baitzuten. Plazatik abiatuta, Burninen egin zuten lehenengo geldialdia. Nonbait, bertako energiek gure gorputzari lasaitasuna eta ongizatea eragiten diete. Goizuetako partean dauden Urgaratako lepoko jentilbaratzak izan ziren aurrena ikusi zituztenak eta Añoneko trikuharrian ere geldialdia egin zuten. Errekalkotik Aranora bitarteko harrespiletaz ere gozatu ahal izan zuten Aranora buelta hegiz hegi eginaz.
Bazkal ondoan, Suhar Arkeologia Elkarteak emandako arkeologia tailerrean denetarako aukera izan zen: sua egin; mural zoragarri bat osatu herriko umeek lagundurik (mamuta, ehiztariak, okrea eta teknika berezi bat erabiliz, eskuak...) eta azkenik ehizarako erramintak nola egiten zituzten erakutsi eta bertaratutakoek lantzak jaurtitzeko aukera ere izan zuten. Gaueko talo tailerrak eta talo eta gaztain jateak betiko jendetza bildu zuen. Aurten, gainera, umeen taloak ederrak atera ziren, borobilak eta goxoak zeuden!