Aiako Andatza auzoko Aristerrazuko belardian egin zituzten kanporaketak uztailaren 26an eta ez zen ezusterik izan. Lehenbizikoan, Orendingo Jesus Mari Ormaetxeak lortu zuen lehen postua, 979,5 kilo belar moztuta. Bigarren posturako lehia estua eskaini zuten Igor Esnaola multzo-buruak eta Iban Pardok, eta azkenean 26 kiloko aldera egon zen egungo txapeldunaren alde. 949 kilo moztu zituen Esnaola legorretarrak. Andoni Urrutiak 726 kilo eta erdi moztu zituen. Bigarren txandan ez zituzten hain marka onak egin. Julen Gabirondo gipuzkoarra izan zen onena, 804,5 kilorekin. Jon Kanflanka leitzarra izan zen bigarren (711,5 kilo) eta finaletik kanpo gelditu ziren Mikel Berekoetxea nafarra (607,5 kilo) eta Iñigo Mercader gipuzkoarra (594,5 kilo).