Kultur Aroaren azken txanpa
Hitzaldien zikloa berriz, ekainaren 4an bukatu zen Torrean egin zen mahai inguruarekin. Dispertsioaren gordinetik izenburupean presoen eta senitartekoen egoeraz solastu zuten. Gaiarekin lotuta ekainaren 2tik 10era arte Torrean, Zirkulon eta Peritzan eta ekainaren 12, 13 eta 14an Atekabeltz herriguneko aretoan Emakumea eta Borroka gaia lantzen duen Pintzelada askeak erakusketa egonen da ikusgai. Itziar Moreno eta Lorentza Beyreren lanek, Alaitz Areitio eta Ekhiñe Eizagirreren olerkiek, eta Sarah Kowalzeskiren argazkiek osatzen dute erakusketa. Mikel Illaregiren Zura eta Ura erakusketa ere Aieneko garbilekuan dago ikusgai, ekainaren 14ra bitartean. Ondoren Iberori buruzko erakusketa ekarriko da.