Azken urteetan euriteen ondorioz kalte handiak izan dira. Esate baterako, Leitzalarretik etortzen den Franki errekako beheko partean, baserri ondoan, urak bidea ia eraman zuen duela urte gutxi. Geroztik erdi zintzilik zegoen herri bidea. Egoera aztertu ondoren beharrezko baimenak eskuratu eta harriekin pareta bat eraiki da. Horrela, bidea egonkortu eta neguan errekak izaten duen ur emari handietatik babestea da asmoa. Larbaidegiko bidean ere sortzen dira arazoak. Bertan euriteen ondorioz erreka osoa sortu eta bidetik joaten da, kalte ugari eraginez. Auzotarren eskariari erantzun eta hodia sartu da ur emaria beste aldetik bideratzeko. Udalak eta auzotarrek elkarlanean burutu dute lan hau auzolanean.