Azaro bukaeran kulturaz blaitu ginen herrian. Mota guztietako ekintzak eta ospakizunak izan ziren eta esan behar da batzuk besteek baino arrakasta gehiago izan dutela, bakarren batzuk akaso eguraldi txarrak eraginda. Ostiral iluntzean Dabid Anauten Euskararen Kate hautsiak liburuaren eta ondorengo dokumentalaren aurkezpena oso ongi irten zen eta baita segidan egin zen udaletxeko goiko solairuaren inagurazioa ere. Elkarrizketa interesgarriak sortu ziren gaiari lotuta eta badirudi jendea gauza berriak martxan jartzeko prest eta gogoarekin dagoela. Ea burutzen diren eta haien berri urte berriarekin batera emateko modua izaten dugun. Larunbatean berriz, herriko plazan eta herrian barna egitekoak ziren ekitaldi ugari, azkenean aterpean egin behar izan ziren. Besteak beste goizean egindako umeen jokuak eta margotze tailerrak eta harri tira saioak. Iluntzean batukada taldeak herrian barna zabaldu zituen perkusio soinuak eta talo goxoak jateko aukera ere izan zen. Hau idazterako orduan kontuak ez zeuden eginak baina jakitan da biltzen den diru guztia Ziburuko Kaskarotenea ikastolari emango zaiola. Azaroa atzean utzi eta abendu erdialdera iritsita, eguberrietako kontuak ezin aipatu gabe utzi. Aurten ere Olentzero eta erregeen bisita eta eskolako haurrak kantuan entzuteko aukera izango dugu datozen egunetan.
Urteroko ekitaldiek ez dute hutsik egingo
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun