Urteko zita garrantzitsuenetakoa izango dugu azaroko azken larunbatean, Goizuetako XI. Feri Eguna hain zuzen. Azienda, artisau eta nekazaritza produktuen postuak ikusgai izango dira goizean zehar, baita trikitilariak, joare egileak, ardi erakustaldia, zerri xangoak, sagardo egileak eta poniak ere. Gainera, aipatzekoa da, Luis Ignacio Lujanbio Etxeberriak garai batean sifoia eta gaseosa egiteko erabiltzen zuen tresneria aterako duela plazara eta duela 20 bat urtera arte nola egiten zuten azalduko du. 12:30ean aizkolariak ariko dira eta 14:30ean herri bazkaria (Txartelak Amaiarenean salgai, umeek doan, gaztetxoek 10 euro, langabetuek 18 euro eta langileek 21 euro).
Bazkal ondoren, poteo musikatua izanen da eta gauean DJ Oattolo Gaztetxean. Beraz, giro ederra nagusi izango da azaro kulturaleko azken hitzorduan.