Goizuetako Azaro Kulturaleko ekitaldi nagusia heldu den larunbateko Azinda Feria Eguna izanen da, baina aurreko asteburuetan bezala, honetan ere zenbait ekintza izan dituzte. Ostiral arratsean, Euskal Herriko altxorretan barrena Arkaitz Astiazaranen dokumentala ikusgai izan zen Ganbaran eta larunbatean sendabelarrei buruzko hitzaldi interesgarria eskaini zuen Maika Cerderak Goxalin. Ikusi argazkiak
Ostiraleko dokumentalari dagokionez, Arkaitz Astiazaran lasturtarrak 4.800 kilometrotan zehar errepideko bizikletaz egindako ibilbidea erakutsi zuen; herrialdeko mendialde, herri eta ingurune ederrenak lotuz, 800 herri eta 175 mendate igaroz 37 etapatan zehar. Basoak, desertu inguruneak, kostaldea, piriniar mendatetzarrak, haran ezkutuak...
Larunbatean Maika Cerderak eskainitako sendabelarrei buruzko hitzaldia entzutera kasik hogei bildu ziren Goxalin.
Azken asteburua
Goizuetako Kultur Taldeak udalaren laguntzarekin antolatutako Kulturaldia hilaren 29ko artisau, nekazaritza produktu eta azinda feriarekin borobilduko da, baina bezperan, Errimatuz garenera arrimatuz ikuskizuna eskainiko du Oskar Estangak 19:30ean Ganbaran.