Urriaren 30ean, Leitzako EHBilduk 2015eko udal hauteskundeetarako plangintza aurkeztu zien herritarrei. Dagoeneko, martxan da hauteskunde lan taldea eta urtarrila bitartean herri programa osatzeko partehartze prozesu bat ireki dute, Hari gara Leitza ehuntzen deitzen dena. Epealdi horretan ahalik eta herritar gehiengana iritsi nahi dute.
Horretarako, lantalde eta saio desberdinak antolatuko dituzte, puntuz-puntu eta arloka herritarren ekarpenak jasotzeko. Ondoren, otsailean lehentasunak adostu eta herri programa eta zerrenden bozketa egingo da.
Lehen aurkezpen honetan, Adolfo Araiz, Nafarroako Parlamenturako EHBilduko zerrendaburuaren azalpenak entzuteko aukera izan zuten bertaratutako 40 lagunek. Nafarroan erregimena aldatzeko gakoez hitz egin ahal izan zuten partaideek. Bestalde, eta alkateak legegintzaldiaren inguruan egindako balorazioa entzun ondoren, talde txikitan banatu eta hainbat gairen inguruan eztabaidatzeko aukera izan zuten. Ondorengo luntxean giro informalagoan jarraitu zuen eztabaidak.
Lan saioak ez dira urriaren 30eko batzarrean amaitu, oraindik maiatzera arte badago zer egina. Beraz, EHBildutik deia luzatu dute herritarrek prozesuan parte har dezaten.