Leitzako herria eta herritarrak protagonista izanen dituen lehiaketa eginen da abenduaren 26an Leitzako zinean 22:30ean. Eskualdeko euskara zerbitzuak egindako proposamenari erantzun eta ekimen hau aurrera aterako zuen lantaldea osatu dute zenbait herritarrek. Leitza izanen da lehiaketako gaia, eta parte hartzaileek galderak erantzun eta proba desberdinak egin beharko dituzte. Helburua herriaren inguruko ezagutza eta herria ezagutzeko gogoa bultzatzea da.
TALDEKAKO LEHIAKETA
Taldekako lehiaketa izanen da: 3 pertsonako 4 talde ariko dira eta parte hartzaileek honako baldintzak bete beharko dituzte: Hiru taldekideetako batek 40 urtetik gorakoa behar du, eta beste batek 30etik beherakoa. Denek 16 urtetik gorakoak izan behar dute. Taldean gutxienez emakumezko bat eta gutxienez gizonezko bat behar dira. Izena emateko epea ireki dute eta azaroaren 10era arte egonen da aukera Euskara Zerbitzura idatzi edo deituta (laga@iparmank.org edo 948510814) edo Karrape Irratian (karrapeirratia@gmail.com edo 948610914).
Izen ematen duten taldeen artean zozketa eginen da, eta lehiaketarako 4 hautatuko dira. Irabazleek 450 euroko txekea eskuratuko dute. Gainerako sariak sailkapenaren arabera banatuko dira, lau taldeen artean: Alex Mugika, Argiñano eta Leitzako jatetxeetan hiru lagunentzako otorduak, Elgorriaga bainu-etxean 3 zirkuitu, Kantuz Topa ikuskizunerako 3 sarrera, Irrisarri Land parkerako 3 sarrera...
Ekimen honek Nafarroako Iparraldeko Euskara Mankomunitatearen eta Leitzako Udalaren dirulaguntza eta babesa jaso du. Baita herritarrena ere, Leitzako Udalak 50.000 euro banatzeko antolatutako parte-hartze prozesuan parte-hartzaileen babesa jaso zuen eta ondorioz baita dirulaguntza ere. Lehiaketa egitasmo zabalago baten parte da eta beste euskarri batzuetan ere zabalduko dira herriaren ezagutza handitzeko eta hobetzeko edukiak.