Leitzako Aurrera Elkarteko Kideek egutegian gorriz seinalatua izanen dute urri hasiera. Urriaren 4an, larunbateko Aurrera Egunaren zortzigarren edizioan, beraiek izanen direlako protagonista egun osoko pestan.
Larunbat goizeko 09:00etan BTT taldearekin, bizikleta irteera eginen dute estaziotik abiatuta. Ordu berean txistulariek diana eskainiko dute. 10:00etan Aurrerako Kirol Jokoen eskutik futbito partida izanen da plazan. 11:00etatik aurrera berriz hitzordu ugari: tirolina, zaldi ibilaldiak eta Aurrerako pilotarien saioa plazan eta Arkixkil futbol zelaian etxeko jubenil mailako taldea Berriozar taldearen aurka ariko da, ligako partidan. 12:00etan Aurrerako dantzariek saioa eskainiko dute plazan. 13:00etan Incansables txarangarekin poteoan ibili ondotik, karrapean bazkaria. Bazkal ondotik bazkideen ingurutxoa eta segidan Eltxetxun jokoa. Gero, Incansables Txaranga eta buruhaundiekin poteoan ibili eta 21:30ean luntxa eta orkestra gizona arituko da Aurrerako atarian.
Jeiki Abesbatzaren kontzertua
Jeiki Leitzako abesbatzak 40 urte daramatza kantuan eta ospatzeko kontzertu didaktikoa eskainiko dute urriaren 3an Leitzako zinean 19:30ean. Kontzertuaz gain, abesbatzaren jarduera, teknikak eta lanketak azalduko dizkiete entzuleei eta abendurako prestatzen ari diren kontzertu bereziaren berri ere orduan emanen dute.