Amabirjin festak abuztuaren 14an, ostegunean, hasi baziren ere, aurreko asteburuan Umeen Egunarekin, motorrak berotzen hasiak ziren dagoeneko. Ez ziren etxeko ttikienak izan egun horretan festaz gozatu zuten bakarrak: txaranga, pilota partidak, zezenak... lau egunen buruan lehertuko zen festaren aurrekari bikainak izan ziren.
Abuztuaren 14an, txupinazoa lehertu eta hurrengo lau egunetan: aurorak, gazteen eguna, pilota partiduak, bertsolariak, zezenak, kontzertuak, sagardo probaketa, bakailao lehiaketa, dantzaldiak... denentzat eta denetarako tartea izan zen. Ohikoa denez, peñaren egunarekin eman zieten bukaera borobila festei.
Urteroko ohiturarekin segiz, abuztuaren 28an Artikutzara joan eta egunpasa ederra egin zuten askok. Eta orain, irailaren 21era begira egonen dira herritarrak Iskibi kanpinean euskal jaia ospatuko baitute.