Herriko pestak hasi aurreko egunean, abuztuaren 9an, Independentzia eguna ospatuko da Leitzan. Herriko eragile ezberdinen artean osatu dute pesta eta aldarria lotzen dituen egun osoko egitaraua.
Goizeko 09:00ak aldera txistularien dianarekin hasiko da eguna. Ondoren, 11:00k aldera ekitaldi politikoa eginen da udaletxean. 11:30etik aurrera herri kirolekin gozatzeko aukera izanen dute plazara gerturatzen direnek, Leitzako Emakumezkoen harri-tira proba eta segidan, kuadrilen arteko herri kirolak antolatu baitituzte plazan. 17:30ean gure ikurrei omenaldia eginen zaie eta ondoren, Igualadatik (Katalunia) etorriko diren Castellers-ek giza-torrea osatuko dute plazan. 19:00tan kalejira berdea eginen da herrian barna, independentziarantz doazen herriei babesa eta bultzada eskainiz. 20:00etan batukada erritmoek hartuko dituzte kaleak eta gauerditik aurrera kontzertuak antolatu dituzte. Pestaren baitan, lekukoa bermeotarrei pasako diete beraiek ere independentziaren aldarria egiten jarraitu dezaten.