Maiatzaren 17an jokatu zen Goizuetako lehenego Goizutrail mendi lasterketa. Korrika egiteko eguraldi bikaina izan zuten kirolariek, nahiz eta mendian laino pixka bat zegoen. Laisterketan 128 pertsonak parte hartu zuten. Ismail Razga santurtziarra eta Ainhoa Lendinez elgoibartarra izan ziren irabazleak.
Gizonezkoetan, Ismail Razga Santurtziarra izan zen lehenbizikoa. Ia 22 kilometroko ibilbide gorabeheratsua egiteko, ordu bat, 47 minutu eta 21 segundo behar izan zituen. Unai Santamaria hernaniarra bigarren izan zen (1:51:57) eta hirugarren Azpeitiako Imanol Larrañaga izan zen (1:54:08).
Emakumezkoen artean, Ainhoa Lendinez elgoibartarra izan zen irabazlea 2 ordu, 18 minutu eta 8 segundoko denborarekin, bigarren Uxune Tena urnietarra (2:20:44) eta hirugarren Irantzu Ibarrondo (2:47:05).
Herritarren artean onena Martin Etxeberria izan zen eta herriko lehenengoa izateaz gain sailkapen orokorreko hamabigarren lekuan iritsi zen (1:59:37). Benetan bikain aritu zen Goizuetako gaztea. Aipatzekoa da herriko 14 korrikalarik parte hartu dutela lasterketan.
Lasterketa bukatu ondoren denek izan zuten dutxatzeko aukera eta ondoren sari banaketa eta zozketak egin ziren bitartean hamaiketakoa ere eskainizitzaien .
Eguna oso ongi joan zen, eta antolatzaileen helburuak bete ziren. Goizuetan mendi lasterketa bat egiteko gogoa zegoen eta datorren urtekoa oraindik ere arrakastatsuagoa izan dadin lanean jarraituko dute, aurtengo edizioa aztertu, eta hobetu daitezkeen gauzak hobetzeko lanean jardungo dute Umore Ona elkartekoek.