Herritarren hitza entzun nahian, Leitzako udalak parte hartze prozesua antolatu du ekainean. Udal-aurrekontuaren zati bat, zehazki 50.000 euro, jarriko ditu herritarrek zertan erabili erabaki dezaten. Horretarako hiru bilera burutuko dira ekaineko hiru ostiraletan zehar. Deialdia irekia da, eta nahi duen herritar orok parte hartu dezake. Lehengo bilera, ekainaren 6an izanen da eta bertan herriaren diagnosia eginen da. Bigarren bileran, ekainaren 13an, lehentasunak finkatu eta azkenekoan, ekainaren 20an, diru kopuru hori nora bideratu erabakiko da.
Herritarrak bileretara gonbidatu eta ezin duenak ere iritzia eman ahal izanen du Astiz eta Maimur liburu dendetan, Udaletxean eta Osasun Etxean jarrita dauden buzoietan. Beraz, Udalak leitzarrak animatu nahi ditu kultura, hezkuntza, ongizatea, zerbitzuak, kirola, euskara, aisialdia edo besteren gaineko proposamenak egitera.
Modu honetan udalak kudeaketa publikoa herritarrekin batera burutu nahi du, leitzarrak diru publikoaren kudeaketaren parte eginaz eta parte-hartzearen bitartez herriko beharrak asetuko dituen eraikuntza kolektiboa sortuz.