Abel Barriolak eta Juan Martinez de Irujok osatutako bikoteak irabazi du eskuz binakako txapelketako txapela, maiatzaren 4an Bizkaia pilotalekuan jokatutako finalean Aimar Olaizolari eta Andoni Aretxabaletari 13-22 irabazita. Hiruna berdindu ondotik, beti aitzinetik ibili ziren Iberokoa eta Leitzakoa, eta markagailuan estutasunik igaro gabe ailegatu ziren 22. tantora.
Urdinek, irabazleek, estu hartu dute Aretxabaleta, eta ez zioten Olaizola II.ari jokoan nahi beste sartzen utzi. Goizuetako aurrelariak ere ohi baino pilota gehiago galdu zituen, eta Irujo eta Barriola, berriz, sendo aritu ziren. Leitzarra izan zen partidako pilotaririk onena.
Binakako txapelketan lehen txapela du Barriolak, eta, horrela, hiru txapelketa handiak (buruz burukoa, binakakoa eta lau t'erdikoa) irabazi dituzten pilotarietako bat izatera igaro da, Retegi II, Arretxe, Irujo eta Olaizola II.arekin batera. «Ilusio berezia egin dit ni ez nagoelako ohituta txapelak irabaztera. 12 urte pasa dira aurrekotik, 12 urte gogor lanean» zioen.
Irujok, berriz, bosgarren aldiz jantzi du binakako txapela.