UEMAko Nafarroako udal ordezkariek prentsa agerraldia egin zuten martxoaren 12an Leitzan. Nafarroako euskalgintzak bizi duen egoeraren aitzinean «kezka eta haserrea» agertu zuten, «Nafarroako Gobernuak, bertze behin, inolako diru-laguntzarik gabe utzi duelako euskara bultzatzeko ekimen eta lan oro». Udalek azkeneko urteotan Nafarroako Gobernuarengandik finantziazio murrizketa handia pairatu dute, eta horien artean, Euskara Zerbitzuek jasan dutena nabarmendu dute. Salatu dute «urterik urte laguntzak murrizten joan dira, erabat desagertu arte». Euren ustez, agerian gelditu da «Nafarroako Gobernuak hizkuntza politika argi eta planifikatu bat baduela Nafarroarako: euskara eremu publikotik erabat desagerraraztea».
2013an inolako diru-laguntzarik gabe gelditu dira Nafarroako udalak eta mankomunitateak euskara zerbitzuetako plangintzak garatzeko. 2014rako aurreikuspena ere bera da, «inolako diru-laguntzarik ez jasotzea» azaldu dute. «Egoera jasangaitza» dela adierazi dute eta udalez gain, euskalgintzako gainerako eragileei ere eragiten diela. Euren hitzetan «Nafarroako aniztasunari bizkar eman eta bertako hizkuntza sustatzeko politikak bazter utzi» ditu gobernuak. Bestelako hizkuntza politika bat «nahi eta behar» dutela aldarrikatzen dute eta horregatik bat egin dute Iruñean martxoaren 22an eginen den manifestazioarekin. Herritarrei ere dei egin diete «euren eta nafar ororen hizkuntza eskubideak kalean aldarrikatzera» joan daitezen.