Azaroaren 24an, igandean, Leitzan jokatuko da Euskadiko 3.mailako aizkora txapelketaren finala. Eguerdiko 12:00etan hasiko da saioa Amazabal pilotalekuan. Sei aizkolari lehiatuko dira, abuztuan jokatutako kanporaketetan sailkatu zirenak eta tartean eskualdeko bi ordezkari arituko dira garaipenaren bila, Asier Pellejero aresoarra eta Mieltxo Mindegia zubietarra. Hauekin batera, Eneko Otaño (Gipuzkoa), Jose Mari Teiletxea (GIpuzkoa), Goizeder Belza (Nafarroa) eta Iban Resano (Nafarroa) ariko dira. Aizkolariek 54 ontzako hiruna enbor eta 60 ontzako bina enbor ebaki beharko dituzte. Igandean lehenbiziko eta bigarren postuetan sailkatzen direnak Euskadiko 2.mailara igoko dira datorren urtean.