Aisialdian ongi pasa eta bide batez ikasteko, eskolaz kanpoko ekintzak eskainiko dituzte herrian. Batez ere herriko haurrei zuzenduak daude eta dagoeneko ikastaroetako batzuei eman diete hasiera. Astean behin, asteazken arratsaldean, ordubetez psikomotrizitatea lantzen dute. Bi taldetan banatzen dira, batean haur hezkuntzako zortzi haur daude eta bestean lehen hezkuntzako bost. Aiboa irakasleak azaldu digunez, ikastaroaren helburua «mugimendu eta jokuen bidez haurrek beraien gorputza ezagutu, eta ekintzetatik pentsamendurako saltoa ematea lortzea da».
Bestalde, pasa den urtean bezalaxe trikitixa eta pandereta saioak ematen hasi dira eskolan. Hauek ere asteazken arratsaldeetan izaten dira. Iazko irakaslea Gorka Arraiago aresoarra izan zen, baina aurten atzerrian dagoenez, Kristina Solano ari da irakasle lanetan. Ez da ardura hau artzen duen lehenengo aldia, duela urte batzuk herriko gazte askok ikasi zuten trikitixa eta panderoa astintzen berarekin.
Guraso Elkartekoek azaldu digutenez multikiroletako saioekin ere sarri hastekotan dira. Oraindik ez dituzte eguna eta ordua zehaztu baina aurreratu digute printzipioz, hamar haurrek eman dutela izena.