Podium batean hiru postu izaten dira jokoan eta hirurak ezagutu ditu berriki Antonio Alustizak. Nafarroako txapelketan lehenengo postua lortu zuen, Euskal Herrikoan hirugarrena eta irailaren 22an, Oñatiko txapelketa famatuan bigarren postua lortu du. Lehia estua izan zen bi lehendabizikoen artean eta azken momentura arte ezin zen jakin nork eskuratuko zuen txapela. Azkenean lau puntuko aldearekin, Alustiza eta Bat txakurra azpitxapeldun suertatu ziren. Estreinaldi ederra izan du Batek, Txiki txapeldun handiaren alabak eta gustura dago Aresoko artzaina. Antolakuntzak, gainera, omenaldi txiki bat eskaini zion abuztu bukaeran hil zen Txiki txakurrari.