Eguraldia lagun izan zuten irailaren 1ean, mendi martxako parte hartzaileek. Ez zen aurreko urteetako euri edo bero sargoririk, goiza freskoa eta orduak pasa ahala eguzkiak goxatu zituen inguruak. Goiz goizetik hasi ziren lanean antolatzaileak. 7:00etarako plazan bildu eta batzuk inskripzioak jasotzen zituzten bitartean, beste batzuek ibilbidean zehar jarritako edari eta janari postuak antolatu zituzten. Horietaz gain, herrian bertan, sukaldariak paella prestatzen aritu ziren, halako mendi buelta egin ondoren, indarrak hartzeko premia izaten dutelako mendizaleek. Mendi martxak bataz beste, 4 edo 5 orduko iraupena izaten du baina azkarragoak ere izaten dira. 2 ordu eta erdian osatu dute buelta aurten azkarrenek. Ibilbidea Aresoko plazan abiatu eta plazan bertan bukatzen dute. Bertan antolakuntzako kideek bakoitzak egindako denbora apuntatu eta parte-hartzaileei mendi martxako kamiseta ematen zaie opari. Eguerdi aldean, paella eta sagardoa izaten da denentzat herriko plazan. Herritarren eta kanpotarren artean giro bikaina sortuz.
ANTOLATZAILEAK GUSTORA
480 mendizalek parte hartu dute mendi martxaren seigarren edizio honetan. Antolatzaileak gustura daude lortu duen arrakasta ikusita. Udalak ere eskerrak eman nahi dizkie partehartzaile guztiei, etortzeagatik eta izandako jarreragatik. Eta nola ez, egunaren aurretik eta egunean bertan herritarrek erakutsitako lanerako borondatea ere azpimarratu dute. Eskerrikasko guztiei!