Bai Euskarari Ziurtagirien Elkarteak urteroko ekitaldi nagusia egin zuen joan den ortziralean Durangon eta arlo sozioekonomikoan euskararen normalizazioaren alde egiten duten Ziurtagiridunen lana aitortu zuen.
Bai Euskarari Ziurtagiriak, alde batetik, Anaje Narbaiza eta Vusa Eraikuntzak saritu ditu aurten, eta beste saria Leitza, Goizueta, Areso eta Aranora etorri da. Azken hauek Arritxu Zelaia Bai Euskarari Ziurtagiriaren Elkarteko lehendakariaren eskutik jaso zuten saria. Kolektibo batek jaso duen lehenengo saria izan da. Zelaiak ekitaldian azaldu zuenez, «bertako ostalari, merkatari, elkartek nahiz enpresek Bai Euskarari egitasmoarekin eta lan mundua euskalduntzeko helburuarekin erakutsitako konpromisoaz gain, lan jardunean euskararen erabilera areagotzen jarraitzeko helburua berresten dute urtez urte. Beren ahalegina eredugarria da beste zonalde batzuetakoentzat eta egiten duten traktore lanak ez du preziorik».
Saria Leitzako Kultur Taldeko Juan Mari Barriolak eta Goizuetako Umore Ona Elkarteko Juan Inazio Loiartek jaso zuten, gainontzeko ziurtagiridun guztien izenean.