Maiatzaren 26an, jokatu zen Umore Ona elkarteak antolatutako Goizuetako krosa eta eguraldi bikaina egin zuten. Denera 158 korrikalari atera ziren, 76 ttikienen kategorietan eta 82 proba nagusian. Gizonezkoetan Irurako Unai Señoran eta emakumezkoetan Iraizozko Vanesa Pacha izan ziren irabazleak.
Txikiek ere izan zuten aukera korrika egiteko, denera 76 neska mutikok hartu zuten parte bi kategoritan eta denentzat izan zen oroigarriren bat.
Helduen laisterketan 82 pertsonak zuten izena emanda eta gizonezkoetan lehenengoa, Irurako Unai Señoran Bengoa izan zen, honek 3 kilometroko zirkuitoari hiru itzuli emateko 32:04 minutu behar izan zituen, benetan marka ederra. Bigarren Aitor Etxeberria Igeldoarra izan zen 30 segundora eta hirugarren Zumaiako Martin Amilibia izan zen, hau 33 segundora iritsi zen.
Emakumezkoen artean, irabazlea, Iraizozko Vanesa Pacha izan zen eta honek 36 minutu eta 36 segundo behar izan zituen ibilbidea osatzeko, bigarren Oreretako Leire Fernandez gaztea eta hirugarren Hernaniko Karen Ortiz de Guinea izan ziren.
Herritarren artean, gizonezkoetan onena Martin Etxeberria izan zen eta sailkapen orokorreko bederatzigarren lekuan iritsi zen gainera (36:00) lehenengo emakumea Ane Zinkunegi izan zen (52:28).
Laisterketa bukatuta dutxatzeko aukera izan zen eta ondoren sari banaketa eta zozketak egin ziren eta hamaiketakoa ere eskaini zitzaien parte hartzaile guztiei.
Eguna oso ongi joan zen eta antolatzaileek iaz berreskuratutako ohiturari jarraipena emanez, balorazio ona egin dute. Iazko parte hartzaile kopurua igo egin da eta 2014an arrakasta haundiago izan dezan lanean jarraituko dute.