Udaberri eta uda usainak mendizale eta bazter hauen maitaleak mugitzen ditu eta Aranon poliki poliki nabaritzen da bisitari hauen emaria igo dela.
Pasa den apirilaren 25ean Errenteriko Telleri ikastetxeko DBHko bigarren mailako ikasle batzuk ederki gozatu zuten. Txautxikiko Enrike Huizi irakasleak aipatu digunez, «autobusak Gutzikin utzi gintuen. Handik, Bekerritik barna herrira joan ginen. Gero, Luxanbi eta Sotsotik Surora joan, eta handik Juan Donostira. Aldapatxoa igo eta bertan hamaiketakoa egin genuen patxada ederrean. Mendiz mendi Oraunera ailegatu, Burniñera joan, han egonaldi bat egin genuen eta Burniñetik Arano herrira joan ginen. Bertan bazkaldu lasai aski eta Gutzikira joan ginen autobusa hartzera».
Herritarrak ere ibilaldi bat egitekotan dira. Latxeko erreka bazterretik atera eta Euntzingo harria izanen dute jomuga egun hauetakoren batean, eguraldiak laguntzen badu.