Maxurrenea eraikina Guardia Zibilaren kuartel bihurtu zenetik hamar urtera, herriarentzat izan dadin eskatzen segitzen du Leitzako Maxurrenea Herrintzat plataformak. Hainbat mobilizazio egin dituzte orain arte eta hemendik aurrera ere gehiago egiteko asmoa badute.
Sinadura bilketa da martxan duten ekimenetako bat eta horretan aritu ziren igandean egin zen Artisau Azokan. Hala ere, oraindik ere sinadurak biltzen segituko dute eta egin nahi duenak ondoko tokietan izanen du aukera: Torrea, Gaztañaga, Landaberri, Peritza, Txoko, Musunzar, Adur, Leitzarra, Beatrizenea, Zortziko, Ogiberri eta Zirkulo tabernetan, udaletxean eta liburutegian, Maimur eta Astiz liburu-dendetan, Sarrio lantegian eta gaztetxean.
Bestalde, ekainaren 8an eginen den manifestazioan parte hartzeko deia ere egin du plataformak.