Joan den urtean herri krosa berreskuratu zuen Goizuetako Umore Ona Elkarteak eta aurten ere eginen da, bigarren urtez segidan, igande honetan, hilak 26.
10:30ean hasiko dira txikienak, 10 urte arteko neska-mutikoak eta 800 metroko ibilbidea eginen dute. 10:45ean alebin, infantil eta kadete mailako korrikalariak aterako dira (11-15 urte artekoak) eta 1.800 metroko ibilbidea eginen dute eta 11:00etan emanen zaio irteera 16 urtetik gorakoen laisterketari. Hiru kilometroko luzera du zirkuituak eta hiru itzuli egin beharko dira, bederatzi kilometro osatuz.
Laisterketaren inguruko informazio gehiago eta izena emateko www.kirolprobak.com webgunean egin daiteke. Izen-ematea orokorrean 10 euro gostako da, baina herritarrentzat 8 euro eta egunean berean 15 euro.
Kanpotik datozen partaideentzat, antolakuntzak dutxak eta motxilak uzteko gunea prestatuko ditu. Gisa berean, parte hartzen dutenentzat opariak izanen dira eta zozketak ere eginen dira.
Sariak
Gizonezko eta emakumezkoetan, sailkapen orokorrean lehenengo hiru postuetan gelditzen direnek sariak izanen dituzte: lehenak txapela, bildotsa eta botil bat ardo; bigarrenak bi txuleta eta botil bat ardo eta hirugarrenak baserriko oilaskoa eta botila ardo. Horiez gain, helmugaratzen diren lehenengo gizonezko eta emakumezko goizuetarrek bakoitzak trofeoa, bildotsa eta botil ardoa hartuko dituzte.